انهيار بلا مقاومة..” ليه الزمالك بقى صيد سهل في الدوري”؟!

✍️ تحليل يكتبه – كمال سعد 

الزمالك خسر من بيراميدز بهدف، لكن الحقيقة إن الهزيمة دي مش مجرد نتيجة، دي انعكاس لحالة فنية متدهورة، وأخطاء متكررة، وغياب شخصية داخل الملعب.

1– أخطاء عواد اللي بتتكرر

هدف المباراة الوحيد كان بسبب خطأ كارثي من محمد عواد، اللي استسهل كرة عرضية من محمود مرعي وسابها توصل لإبراهيم عادل، واللي ما صدق وسجل. ده مش أول خطأ من عواد، لكن المدهش إن الجهاز الفني لسه معتمد عليه رغم تذبذب مستواه.

2– خط وسط “مش موجود”

دونجا، صلاح مصدق، وسيف جعفر فشلوا في السيطرة على وسط الملعب. غياب الضغط والافتكاك، وعدم وجود تمريرات مؤثرة خلّى بيراميدز يعمل اللي هو عايزه. عبد الله السعيد حاول يصنع فارق لكنه كان لوحده وسط توهان تكتيكي.

3- تغييرات متأخرة وبدون معنى

تأخر الجهاز الفني لفريق الزمالك بقيادة أيمن الرمادي في التبديلات، ولما اتحرك، التغييرات ما فرقتش. أحمد فتوح نزل بدري نسبيًا، لكن الباقي زي حسام أشرف وإيشو اتدفع بيهم لما المباراة كانت بتخلص، وكأنهم بيشاركوا علشان يقال إن “فيه تغييرات”.

4– الهجوم من غير أنياب

ناصر منسي ومصطفى شلبي ماعملوش أي خطورة حقيقية. وكل محاولات الزمالك كانت فردية أو من كرات ثابتة بعيدة عن الخطورة. سيف الجزيري دخل متأخر جدًا، وفشل كعادته في ترك بصمة.

5- فقدان الروح

المشكلة الأعمق من أي تكتيك أو مهارة، هي إن الزمالك بيلعب من غير روح. الفريق شكله تايه، بيتلقى الهدف في الدقيقة 21، ويكمل باقي المباراة من غير رد فعل حقيقي.

6– مدرب مش قادر يقرأ المباراة

الجهاز الفني بالكامل، واضح إنه مش قادر يتعامل مع المباريات الكبيرة. قدام بيراميدز، مافيش خطة واضحة، مافيش حلول، مافيش شراسة. الفريق نازل الملعب وكأنه بيأدي واجب.

الخلاصة؟

الزمالك خسر لأنه تايه، فنيا ونفسيا. ولأن اللي ماسك الفريق مش قادر ينقله شخصية أو حلول. طول ما الفريق بيلعب من غير تنظيم ومن غير غيرة على التيشيرت، الهزائم هتكون العنوان الرئيسي.

عايزين وقفة.. مش بس مع اللاعبين.. لكن مع كل اللي ورا المشهد.

كفاية هزائم.. وكفاية تبريرات.