هشام يكن لـ زيزو: “ما تنساش مين اللي رباك ووقف جنبك!”

✍️ محمد محمود 

وجّه هشام يكن، نجم الزمالك السابق، رسالة قوية إلى أحمد سيد زيزو، بعد ما تردد مؤخرًا عن اقترابه من الرحيل عن الزمالك، مؤكدًا أن الحب والدعم اللي لقيه من جمهور القلعة البيضاء مش هيلاقيه في أي مكان تاني.

وقال يكن: “أوعى تنسى يا زيزو إنك كنت احتياطي في المنتخب، وملعبتش غير آخر ماتشين بس، وهتبقى احتياطي في الأهلي برضه لو رحتله. لكن اللي لازم تفتكره كويس هو حب جمهور الزمالك، الجمهور ده هو اللي وقف جنبك في كل لحظة، في وقت ما كنت بتتعرض لهجوم، هما اللي ساندوك، وهتفوا باسمك، وصدقوا فيك.”

وأضاف: “جمهور الزمالك هو اللي رباك كرويًا، هو اللي احتواك ودعمك، وهو اللي خلاك نجم من نجوم الكرة في مصر. الحب ده مش هتلاقيه في أي مكان تاني، ولا حتى في الأهلي، لأن جمهور الزمالك بطبعه مختلف، بيحب من قلبه، وبيخلص للاعبينه.”

واختتم يكن كلامه قائلاً: “لو قررت تمشي، فكر كويس، لأن خسارة حب جمهور الزمالك مش حاجة بسيطة.. وممكن تندم يوم على لحظة استغنيت فيها عن حضن الجماهير دي.”