عبد الرحمن جبنه ضحية جديدة لمافيا كرة القدم في مصر ، وعبدالرحمن خالد جبنة لاعب المقاولون السابق،تعرض لصدمة كبيرة بعد فسخ تعاقده من نادي “العربي الكويتي” بعد 11 يوم.
وقال جبنه : حقيقي مش مستوعب اللي حصل معايا.. مش قادر أفكر ومش عارف مستقبلي رايح فين ولا جاي منين، حاسس إني بحلم، عُمر في بني أدم يعمل كدا في حد
اضاف : نادي العربي قال إني مضيت لنادي تاني (درجة رابعة) بدون علمهم ودا محصلش، انا بلعب في الدوري المصري من 9 سنين وبيجلي عروض من أندية كتيره عمري ما أعمل كدا..
كشف جبنه : الحكاية أن في مدرب كبير في مصر، قالي أن في وكيل كويس خليك معاه هيعملك كل اللي انت عايزه، المهم أن الوكيل دا مضيت معاه، وقال انا هجبلك عروض ولو النادي مبيدفعلكش فلوسك هديلك فلوسك، وكبرت المدرب اللي نصحني وروحت مضيت معاه فعلا.. في فترة كنت باخد منه مبلغ كل شهر.. لأن نادي المقاولون مكنش بيطلع فلوس بسبب النتائج، وانا عندي أسرة وعندي التزامات، وكنت متفق معاه إن لما يجيلي عروض هدفعله الفلوس اللي خدتها وكمان جدعنه هديله جزء من فلوس أي نادي هروحه
اوضح : ولما لقيته مش شغال ومفيش عروض جبهالي.. روحت نادي العربي، وبعد ما روحت.. لقيت الشخص دا بيهدد وكيلي أنه هيبطلني كورة، ومش هيخليني ألعب كورة تاني.. ومصمم يأذني وعاوز فلوس أكتر من انضمامي للعربي، وقولت له أنا مخدتش فلوس لسا من النادي ولما أخد فلوس هديلك فلوسك
أتم : أخد عقود مضيتها معاه من سنه وراح حطها في نادي في الدرجة الرابعة، وراح اشتكاني لنادي العربي على اساس اني ماضين في ناديين.. في ورقة في اتحاد الكرة راحت لـ النادي العربي أني مقيد في نادي الدرجة الرابعة، وانا مش مقيد معاهم أصلا!!
اختتم جبنه :دي كارثة ان في حد واخد فلوس من الاتحاد علشان يبعت ورقه للنادي العربي، ورقة مزورة!! ازاي حد يعمل كدا علشان ألف ولا ألفين جنيه، حسبي الله ونعم الوكيل في أي حد.
01091010400 