طارق يحيى غاضبًا: “هوية الزمالك بتضيع.. ومفيش ثقة في أولاد النادي!”

أطلق الكابتن طارق يحيى، نجم نادي الزمالك السابق، انتقادات لاذعة لإدارة القلعة البيضاء على خلفية التغييرات الإدارية الأخيرة، معتبرًا ما يحدث بمثابة «إهانة لهوية النادي» و«إقصاء واضح لأبنائه».

وقال طارق يحيى في تصريحات إعلامية عبر قناة النهار:
“أنا مصدوم ومذهول من اللي بيحصل.. إدخال أسماء من خارج النادي في مناصب فنية حساسة أمر غير مقبول، وبيأكد إن مفيش أي ثقة في أبناء الزمالك”.

وأضاف:
“عبدالناصر محمد شخص محترم، لكن مدير الكرة في الزمالك لازم يكون من أبناء النادي.. مش معقول كل شوية ناس من بره، وفين إسماعيل يوسف؟ وائل القباني؟ عبد الواحد السيد؟ إحنا بنفقد هويتنا”.

وشدد يحيى على أن أزمة الزمالك الحالية ليست في الأسماء فقط، بل في غياب الرؤية والاحتواء:
“مافيش مانع إنك تجيب مدير رياضي من بره، لكن مدير الكرة لازم يكون لعب كورة ويفهم طبيعة النادي.. إحنا وصلنا لمرحلة بنغير حتى عمال أوضة اللبس؟”.

وأشار إلى أن أبناء الزمالك لا ينقصهم الكفاءة:
“أحسن مدربين في مصر دلوقتي من أبناء الزمالك: خالد جلال، محمد حلمي، طارق مصطفى، مؤمن سليمان، الشيشيني.. كلهم ناجحين لكن مفيش ثقة فيهم”.

وأنهى تصريحاته قائلًا:
“مش هسكت لما أشوف النادي بيضيع.. أنا بتكلم كزملكاوي، مش طالب شغل ولا منصب، لكن هوية الزمالك بتتبخر، والجماهير مش هتسكت كتير”.