نيرة الأحمر تنتقد تصرف حسين الشحات: “ليه نبوظ الصورة؟ دي خلقة ربنا مش مادة للسخرية”

وجهت الإعلامية نيرة الأحمر انتقادات حادة لتصرف حسين الشحات لاعب الأهلي تجاه خوان بيزيرا مدرب الأحمال في الزمالك، خلال مباراة القمة الأخيرة، مؤكدة أن الحركة التي قام بها الشحات بعد هدف التعادل كانت غير لائقة وتنطوي على سخرية وتنمر.

نيرة قالت عبر راديو صوت الزمالك: “يا حسين الشحات أنت نزلت شكّلت فارق كبير، جبت هدف، جبت ضربة جزاء، وخدت رجل المباراة، يعني فنياتك كانت كافية تخليك نجم الليلة، ليه نعمل لقطة تبوظ كل ده؟”

وأضافت: “أنت ليك في الشيبي عبرة، واللي حصل وقتها كان كبير جدًا، واتأسفنا واتبهدلنا، ليه نكرر نفس الغلط؟ ليه دايمًا مع حد أجنبي؟ ما هو ممكن يشتكي لسفارته وتدخلنا في أزمة دولية مالهاش لازمة.”

وتابعت: “إيه اللي بتستفاده من الحركة دي؟ تقول له إنه قصير؟ دي خلقة ربنا، أنت طويل، غيرك قصير، غيرك متوسط، إيه المشكلة؟ دي مش حاجة نضحك عليها، ولا نستخدمها في الاستفزاز، خاصة وإنت راجل مصلي وعلامة الصلاة في وشك، إزاي نربط ده برياضة المفروض تبقى أخلاق قبل أي حاجة؟”

نيرة ختمت رسالتها قائلة: “أنا بكلمك من باب المصلحة العامة، بعيدًا عن أي انتماء، لأن اللي حصل ممكن يولع الدنيا، وإحنا بنحاول نهدّي ونرفع شعار لا للتعصب، مش ننسفه بلقطة فردية.”